Ministério Transporte no Komunikasaun Realiza Serimónia Estabelesimentu Diresaun Munisipál Transporte No Komunikasaun Iha Munisípiu Lima Mak Hanesan Aileu, Ainaro, Ermera, Liquiça no Manatuto.

Dili, 29 Abríl 2025 – Ministério Transporte no Komunikasaun realiza Serimónia estabelesimentu Diresaun Munisipál Transporte no Komunikasaun iha munisípiu lima mak hanesan Aileu, Ainaro, Ermera, Liquiça no Manatuto.

Iha serimónia ne’e 𝐌𝐢𝐧𝐢𝐬𝐭𝐫𝐮 𝐓𝐫𝐚𝐧𝐬𝐩𝐨𝐫𝐭𝐞 𝐧𝐨 𝐊𝐨𝐦𝐮𝐧𝐢𝐤𝐚𝐬𝐚𝐮𝐧 𝐄𝐧𝐠. 𝐌𝐢𝐠𝐮𝐞𝐥 𝐌𝐚𝐫𝐪𝐮𝐞𝐬 𝐆𝐨𝐧ç𝐚𝐥𝐯𝐞𝐬 𝐌𝐚𝐧𝐞𝐭𝐞𝐥𝐮, tersa ohin nomeia Augosto Amaral nu’udar Diretór Munisipál Transporte no Komunikasaun Munisípiu Aileu, Maria Marcela Corte-Real, Diretór Munisipál Transporte no Komunikasaun Munisípiu Ainaro, Faustino Soares Diretór Munisipál Transporte no Komunikasaun Munisípiu Ermera, Alberto A.C Pereira, Diretór Munisipál Transporte no Komunikasaun Munisípiu Likisa, no Arnaldo Pires Diretór Munisipál Transporte no Komunikasaun Munisípiu Manatuto.

serimónia ne'e asisti direta husi 𝐕𝐢𝐬𝐞 𝐌𝐢𝐧𝐢𝐬𝐭𝐫𝐮 𝐌𝐀𝐄, 𝐉𝐚𝐜𝐢𝐧𝐭𝐨 𝐑𝐢𝐠𝐨𝐛𝐞𝐫𝐭𝐨, Prezidente Komisaun Funsaun Públika, Agostinho Letêncio de Deus, Prezidente Autoridade Munisípiu Aileu, Ainaro, Ermera, Likisa, Manatuto, funsionáriu MTK Kargu xefia sira. serimónia ne'e halao iha sala enkontru MTK Kaikoli Dili.

𝐕𝐢𝐬𝐞 𝐌𝐀𝐄, 𝐉𝐚𝐜𝐢𝐧𝐭𝐨 𝐑𝐢𝐠𝐨𝐛𝐞𝐫𝐭𝐨 iha nia diskursu hatete Serimónia ida ne’e hanesan pasu pozitivu ida hodi alkansa servisu sira ne’ebé mak governu da sia planeia ona, objetivu prinsipál ba iha serimónia ida ne'e maka prioridade boot ida husi governu da-sia atu hahú estabele desentralizasaun no poder lokál hodi hakbesik servisu sira, atendimentu sira ba iha munisípiu.

Estabelesimentu Diresaun Munisipál Transporte no Komunikasaun iha munisípiu lima ne’e, kompleta ona servisu sira iha munisípiu hodi hakbesik ba komunidade sira liuhosi prestasaun servisu ne'ebé efetivu, hodi halo atendimentu ba komunidade sira iha munisípiu.

Hafoin realiza serimónia estabelesimentu Diresaun Munisipál Transporte no Komunikasaun ba jornalista sira, 𝐌𝐢𝐧𝐢𝐬𝐭𝐫𝐮 𝐌𝐚𝐧𝐞𝐭𝐞𝐥𝐮 hatete nomeiasaun ida ne’e atu kompleta estabelesimentu diresaun servisu sira munisipiu.

“Ita kompleta ona Diresaun Munisipál Transporte no Komunikasaun iha munisípiu sira, governu da sia atu estabelese diresaun servisu munisipál sira, hodi halo preparasaun ba desentralizasaun, ohin ita kompleta ona, munispiu lima ne'ebé mak laiha diresaun servisu munisípál kona-ba transporte no komunikasaun bazeia ba despaxu husi funsaun publika ohin ita halo nomeasaun ba diretór nain lima, ho nune’e sira bele halo kna’ar iha munisipiu lima kompostu husi Aileu, Ainaro, Ermera, Manatutu No Likisa. Sira nia mandatu hahú husi loron 31 abril too 31 dezembru tinan 2025. Depois ita hare karik iha rekrutamentu bazeia ba meritu ou funsaun públika halo extensaun ba sira nia mandatu, bainbian fulan neen ou tolu hodi hein prosesu tuir mai” tenik 𝐌𝐢𝐧𝐢𝐬𝐭𝐫𝐮 𝐌𝐚𝐧𝐞𝐭𝐞𝐥𝐮 iha serimónia estabelesimentu Diresaun Munisipál Transporte no Komunikasaun iha munisípiu lima.

Fontes :Média MTK